Turn-over Ceremony of Covered Space with Stage in Tibolo Elementary School

Bag-ong nahuman nga proyekto ug naa pay umaabot nga dagkung proyekto. Mao kini ang tinubdan sa tumang kalipay sa mga magtutudlo, ginikanan, opisyales sa barangay nga gipangulohan ni Kap. Henry Monon, ug lomolopyo sa Barangay Tibolo, Sta. Cruz, Davao del Sur. Kini human nga giintrigo na niadtong Pebrero 3, 2021 ang usa ka Covered Space with Stage nga nahimutang sulod sa Tibolo Elementary School.

 

Mismong si Gov. Dodo Cagas, inubanan ni Vice Gov. Marc Cagas ang nanguna sa pag turn over sa nasangpit nga gambalay nga hilabihan ang kamahinungdanon ngadto sa maong tolonghaan. Nagkantidad og dul-an 1.2 milyones ka pesos, gikuha gikan sa Provincial Special Education Fund ang pondo nga gigamit sa pagpatukod niini.

 

Sa susamang okasyon, gibutyag usab sa mag-amahang Cagas ang hapit na usab masugdan nga pagpasemento sa dalan nga magasumpay sa Davao del Sur ug Davao City. Gitawag kini ug Agri-Tourism Highway nga magsugod gikan sa Barangay Kapatagan, Digos City, moagi sa Barangay Tibolo ug Sibulan sa Sta. Cruz, ug molusot na ngadto sa Calinan, Davao City. Matud pa, aduna kini kinatibuk-ang kantidad nga 360 milyones ka pesos (Phase 1 & 2), nga bunga sa paningkamot ni Congw. Didi Cagas.

 

Wala usab pakyasa ni Vice Gov. Marc Cagas ang pagpadayag sa iyang pagdayeg ug pasidungog ngadto sa iyang inahan tungod sa diskarte ug kakugi niini. Lakip nga gituki sa opisyal ang isyu kalabot sa ancestral domain nga gipanag-iyahan sa tribung Bagobo-Tagabawa hilabi na ang isyu sa Sitio Lutangan sa Kapatagan nga giplanohang himoong training center sa PNP Region XI, nga walay igong pananghid ug pagtugot sa tribu.

 

#PIOBalita

Photographers: