Dul-an Usa ka Libo Ka Mga Benepisyaryo sa Emergency Employment Program (EEP), Naka Dawat sa Ilang Sweldo

Nadawat na sa dul-an usa ka libo ka mga benepisyaryo sa Emergency Employment Program (EEP) sa Department of Labor and Employment (DOLE) ang ilang sweldo nga P3,960.00 matag usa sa napulo ka adlaw nga pagtrabaho sa kabarangayan.

 

Gipahigayon ang maong aktibidad didto sa likod nga bahin sa Coliseum nga gitambongan nila Gov. Dodo Cagas inubanan ni Congressional Staff Irick Agbon ug anaa usab si DOLE Provincial Director Engr. Raymundo Dennis Badilles ug Police Leutenant Orlando Uvalde, leader sa RPSB Colonsabac.

 

Gikanayon ni DOLE Provincial Director Engr. Badilles nga kantidad sa kapin P3.8 million ang narelease karong adlawa ngadto sa 959 ka mga benepisyaryo nga gikan sa 8 ka munisipalidad ug syudad sa Digos. “Kining programaha sa Department of Labor and Employment (DOLE) amo ning gicoordinate kang CongW. Didi Cagas sa iyang opisina. Dili man me makaimplementar ani kung walay coordination sa LGU…Magpasalamat pud ta sa atong Congresswoman ug Provincial Governor nga sukad last year sige’g hatag og ayuda para sa kaayuhan sa Probinsiya”, dugang pahayag sa DOLE Provincial Director.

 

Gipasabot ni Congressional Staff Agbon nga gikan sa Nasudnong Panggamhanan ang maong program nga gipaningkamutan ni Congresswoman Cagas pinaagi kang DOLE Secretary Silvestre Bello III aron makunhuran ang impak sa COVID-19 hilabi na sa mga informal settlers sama sa mga mag-uuma ug uban pa nga nawad-an og trabaho gumikan sa pandemic. Dugang ni Agbon nga hiniusang paningkamot sa DOLE, buhatan ni Congresswoman Cagas, Provincial Government ug Philippine National Police (PNP) ang maong programa sanglit apil sa mga nakabenepisyo ang mga anaa sa lagyo ug hilit nga lugar nga gikonsiderang red areas nga adunay mga kaso sa insurhensiya.

 

#PIOBalita